វែលស៍៖ ខ្សែបម្រើ Aaron Ramsey ត្រូវបានប្រគល់តំណែងជាប្រធានក្រុម (Captain) នៃក្រុមបាល់ទាត់ជម្រើសជាតិវែលស៍ ក្រោយពីអតីតកីឡាករ Real Madrid ខ្សែប្រយុទ្ធ Gareth Bale បានប្រកាសពីការចូលនិវត្តន៍ ដែលមានន័យថាគេនឹងត្រូវដឹកនាំក្រុមជម្រើសជាតិចូលរួមក្នុងវគ្គជម្រុះនៃព្រឹត្តិការណ៍ UEFA Euro ២០២៤ ខាងមុខ។ នេះបើតាមការប្រកាសរបស់សហព័ន្ធកីឡាបាល់ទាត់វែលស៍។ 

Ramsey ក៏ធ្លាប់ទទួលបានស្លាក Captain ម្តងរួចមកហើយ ពោលគឺនៅវ័យ ២០ឆ្នាំកាលពីឆ្នាំ២០១១ មុនពេលដែលស្លាកប្រធានក្រុមត្រូវបានកាន់កាប់ជំនួសដោយកីឡាករ Ashley Williams។ កីឡាករ Aaron Ramsey គឺជាកីឡាករដែលមានវ័យច្រើន និងបង្ហាញខ្លួនជាមួយក្រុមជម្រើសជាតិវែលស៍បានច្រើនជាងគេរហូតដល់ ៧៨ដង ដែលសាកសមទទួលតំណែងនេះក្រោមការដឹកនាំរបស់គ្រូបង្វឹក លោក Rob Page។

គួរបញ្ជាក់ថា Bale ដែលមានបញ្ចប់អាជីពជាមួយជម្រើសជាតិនៅវ័យ ៣៣ឆ្នាំ ធ្លាប់បានបង្ហាញខ្លួនឱ្យក្រុមជម្រើសជាតិ ១១១ប្រកួត ដែលបានសម្រេចចិត្តចូលនិវត្តន៍កាលពីខែមករា ជាមួយកីឡាករ  Joe Allen, Chris Gunter និង Jonny Williams ក្រោយលទ្ធផលមិនសមប្រកបនៅក្នុងព្រឹត្តិការណ៍ FIFA World Cup ២០២២ នៅប្រទេសកាតា។

បច្ចុប្បន្ននេះ វែលស៍សំបូរដោយកីឡាករវ័យក្មេងត្រៀមចូលរួមការប្រកួតជម្រុះ EURO ២០២៤ ដូចជាកីឡាករ  Luke Harris របស់ Fulham វ័យ ១៧ឆ្នាំ, Jordan James របស់ Birmingham City វ័យ ១៨ឆ្នាំ, Neco Williams និង Brennan Johnson របស់ Nottingham Forest វ័យត្រឹម ២១ឆ្នាំជាដើម។ វែលស៍ នឹងត្រូវបើកយុទ្ធនាការជម្រុះ Euro ២០២៤ របស់ខ្លួនក្នុងពូល D នាថ្ងៃទី២៥ ខែមីនា ដោយធ្វើដំណើរទៅប៉ះក្រូអាត មុននឹងឡេតូនីធ្វើដំណើរមកទឹកដីកីឡដ្ឋានទីក្រុង Cardiff នៅថ្ងៃទី២៨ ខែមីនា ពោលគឺនៅ ៣ថ្ងៃបន្ទាប់ ខណៈតួកគី និងអាមេនីក៏ស្ថិតនៅក្នុងពូលនេះដែរ៕